Признанието за придонес на дијаспората за 2026 година му е доделено на Антонијо Трпевски од Шведска

За неговиот исклучителен филантропски ангажман, посветеноста на развојот на младите и континуираниот придонес во зајакнувањето на врските меѓу Македонија и нејзината дијаспора.

Македонија2025 со гордост му го доделува признанието на Антонијо Трпевски од Шведска – успешен претприемач, филантроп и посветен член на македонската дијаспора. Роден во Скопје и длабоко поврзан со Македонија преку семејството, јазикот, културата и националниот идентитет, г. Трпевски поголемиот дел од својот живот го поминал во Шведска, каде што изградил успешна претприемачка кариера, истовремено негувајќи ја блиската поврзаност со својата татковина.

Признанието официјално му го врачи претседателката на Македонија, Н.Е. проф. д-р Гордана Сиљановска-Давкова, на 11 мај 2026 година во Вила Водно во Скопје, за време на свеченото отворање на Самитот на Македонија2025 за 2026 година, посветено на оддавање почит на придонесот на македонската дијаспора.

Потекнувајќи од семејство со силна фудбалска традиција, Антонијо Трпевски во текот на целиот живот ја негувал својата поврзаност со Македонија преку редовни посети, ангажман во заедницата и силно чувство на припадност кон македонскиот идентитет.

Како претприемач и филантроп, г. Трпевски доследно покажува дека деловниот успех може и треба да биде придружен со општествена одговорност. Преку своите компании, фондацијата и личниот ангажман, тој поддржал бројни иницијативи во областа на образованието, развојот на младите, хуманитарната дејност, спортот, културата и зајакнувањето на заедницата. Неговата работа одразува долгорочна визија – вложување во луѓето, поддршка и охрабрување на младите генерации и создавање трајни мостови меѓу Македонија и македонската дијаспора.

Еден од неговите најзначајни придонеси е поддршката за спроведување на меѓународно признатата образовна и мотивациска програма „Star for Life“ во Македонија. Преку оваа иницијатива директно биле опфатени околу 1.200 ученици, а дополнителни 400 ученици биле вклучени индиректно, заедно со десетици наставници и претставници на педагошкиот кадар. Програмата придонесува за зголемување на самодовербата и мотивацијата на учениците, развивање на нивните лидерски вештини и подготвеноста активно да учествуваат во општеството.

Придонесот на г. Трпевски е особено видлив и во областа на спортот. Како долгогодишен поддржувач и главен спонзор на КСД Македонија во Малме, тој помогнал во зајакнувањето на клубот, кој не претставува само спортска организација, туку и значаен симбол на македонскиот идентитет во Шведска. Преку оваа поддршка, тој придонесува за развојот на младите спортисти, поврзувањето на заедницата и промовирањето на Македонија преку спортот.

Покрај образованието и спортот, Антонијо Трпевски активно поддржува културни и општествени иницијативи преку кои Македонија се промовира на меѓународно ниво. Во 2025 година тој организираше посета на шведски деловни претставници на Македонија, поврзувајќи истакнати личности од различни сектори и создавајќи можности за меѓународна соработка. Како дел од овој ангажман, тој ја поддржа и културната размена преку донацијата на бронзена биста на нобеловецот Томас Транстромер, која денес е поставена во Домот на браќата Миладиновци во Струга.

Она што го прави придонесот на г. Трпевски особено значаен се неговата доследност и автентичност. Неговиот ангажман не се сведува на еднократна поддршка, туку претставува долгогодишна посветеност да ѝ возврати на заедницата. Преку својот пример, тој покажува дека припадниците на дијаспората можат да имаат исклучително значајна улога во промовирањето на Македонија, поддршката на нејзините граѓани и придонесот кон развојот на земјата.

За Македонија2025 претставува особена чест да му го додели ова признание на Антонијо Трпевски за неговата посветеност, дарежливост и лидерство. Неговата работа е инспиративен пример за ангажман на дијаспората заснован врз идентитет, одговорност и искрена посветеност на иднината на Македонија.