Признанието за придонес на дијаспората за 2026 година ѝ е доделено на Елизабет Наумовски од Канада

За нејзиниот исклучителен придонес во областа на лидерството, финансиската писменост, економското и општественото зајакнување на жените, филантропијата и промовирањето на македонскиот идентитет во дијаспората.

Македонија2025 со гордост ѝ го доделува признанието на Елизабет Наумовски од Канада – истакната деловна лидерка, медиумска личност, филантропка и активна членка на македонската дијаспора. Родена во Торонто како прва генерација Канаѓанка, во семејство на македонски иселеници со потекло од прилепскиот и битолскиот крај, г-ѓа Наумовски во текот на целиот живот останала силно поврзана со Македонија, нејзините вредности, култура и заедница.

Признанието официјално ѝ го врачи претседателката на Македонија, Н.Е. проф. д-р Гордана Сиљановска-Давкова, на 11 мај 2026 година во Вила Водно во Скопје, за време на свеченото отворање на Самитот на Македонија2025 за 2026 година, посветено на оддавање почит на придонесот на македонската дијаспора.

Преку својот долгогодишен професионален и јавен ангажман, г-ѓа Наумовски има остварено значаен придонес во областите на лидерството, финансиската писменост, зајакнувањето на жените, промовирањето на културата и создавањето позитивно општествено влијание. Како потпретседателка за маркетинг во Caldwell Securities Ltd. и авторка, продуцентка и водителка на националната телевизиска емисија „Empowered. with Elizabeth Naumovski“, таа создаде платформа за значајни разговори за образованието, лидерството, финансиската независност, здравјето, истрајноста и личниот развој.

Еден од нејзините најзначајни придонеси е повеќедецениската посветеност на унапредувањето на финансиската писменост, особено кај жените, младите и ранливите заедници. Повеќе од 25 години, таа доброволно ги вложува своето време, знаење и лични ресурси за да им помогне на поединците и заедниците да стекнат поголема финансиска сигурност, самостојност и самодоверба.

Нејзиниот општествен ангажман ги опфаќа и филантропијата и заштитата на ранливите групи. Таа има развиено повеќејазични едукативни кампањи за спречување измами, со кои придонесува за заштита на имигрантите и повозрасните лица од финансиски злоупотреби. Преку својата хуманитарна работа и личен пример, таа покажува дека придонесот кон заедницата може истовремено да биде професионален и длабоко личен.

Г-ѓа Наумовски е посветена и на поддршката на идните генерации. Таа воспостави годишна стипендија на колеџот Mohawk, наменета за студентки во областите на науката, технологијата, инженерството и математиката. На овој начин придонесува за намалување на финансиските пречки и ги поттикнува младите жени да градат кариера во STEM-областите.

Нејзината поврзаност со Македонија е силна, лична и трајна. Преку ангажманот во организации и здруженија на Македонците во дијаспората, поддршката на македонската култура и медиумското присуство, г-ѓа Наумовски придонесува за промовирање на македонскиот идентитет, вредности и приказни во Канада и пошироко. Повеќе од 15 години таа беше дел од Македонскиот филмски фестивал, поддржувајќи ја промоцијата на македонската уметност, кинематографија и културно наследство во странство.

Во своето кратко, но длабоко емотивно обраќање на церемонијата, Елизабет Наумовски ја истакна силната поврзаност со своето македонско наследство и вредностите што ги наследила од своите родители:

„Ме израснаа моите македонски родители, кои ми ги пренесоа сите вредности. Ми го дадоа јазикот. Ми го дадоа орото. Ми дадоа сè поради што денес сум тука и сè што претставувам. Кога ќе го слушнам тапанот, крвта ми заигрува. Тоа е Македонија за мене.“

Таа додаде дека со децении посветено работи на унапредувањето на финансиската писменост и зајакнувањето на жените, нагласувајќи дека ова признание има особено значење за неа затоа што ѝ го врачила првата жена претседателка на Македонија, проф. д-р Гордана Сиљановска-Давкова.

„Јас сум Македонка и секогаш ќе бидам“, истакна Наумовски.

Она што го прави придонесот на г-ѓа Наумовски особено значаен се неговата автентичност, доследност и човечка димензија. Нејзината работа не се однесува само на професионалниот успех, туку и на создавањето можности, зајакнувањето на жените, поддршката на младите и градењето посилни, поинформирани и посамоуверени заедници.

Со гордост ѝ го доделуваме признанието на Елизабет Наумовски од Канада за нејзината посветеност, лидерство и инспиративен придонес – вредности што ја одразуваат мисијата на Македонија2025 и трајната сила на македонската дијаспора ширум светот.