Младите лидери ги претставија своите бизнис идеи на завршниот настан на проектот LEADER

Со презентација на бизнис-идеи пред жири составено од истакнати македонски деловни лидери и со свечено доделување сертификати во присуство на Н.Е. Мишел Камерон, амбасадорка на Канада во Македонија, успешно заврши проектот LEADER, Обука за развој на бизнис и претприемништво. Програмата ја организира Македонија2025 во партнерство со реномираната бизнис-школа Ivey при Универзитетот Western во Канада, а е наменета за млади професионалци, идни менаџери и претприемачи од целата земја.

Во текот на две интензивни недели, учесниците работеа на клучни области од деловното работење, меѓу кои стратегија, финансиски менаџмент, маркетинг, развој на производи, човечки ресурси и лидерство. Обуката се спроведуваше преку студии на реални деловни случаи, симулации и практични задачи засновани на методологијата на Ivey, а беше надополнета и со индивидуални менторски сесии со искусни канадски предавачи. Во рамките на програмата се одржаа и гостински предавања на истакнати македонски деловни лидери, кои ги споделија своите искуства и професионални сознанија.

Еден од најзначајните моменти во програмата беше натпреварот за презентација на бизнис-идеи, на кој учесниците ги претставија своите концепти пред петчлено жири составено од македонски деловни лидери. Презентациите беа оценувани според нивната иновативност, одржливост и пазарен потенцијал, овозможувајќи им на учесниците да го применат новостекнатото знаење во реална и конкурентна деловна средина.

На завршната свеченост, Н.Е. Мишел Камерон, амбасадорка на Канада во Македонија, им се обрати на учесниците и лично им ги врачи сертификатите за успешно завршување на програмата. Во своето обраќање, таа го истакна меѓународното значење на програмата и нејзината улога во развојот на идните лидери и претприемачи.

Преку оваа иницијатива, Македонија2025 продолжува посветено да придонесува кон развојот на идни лидери и претприемачи, кои ќе го поттикнуваат економскиот раст и иновациите во земјата. Посебна благодарност упатуваме до сите учесници за нивната посветеност, до членовите на жирито за издвоеното време и споделената експертиза, како и до предавачите и менторите за нивната поддршка во текот на целата програма.