Донирај
X

Идни Настани

Дружете Не

Category

Announcements

Доделени десет стипендии за талентирани средношколци и студенти

By | Announcements | No Comments

Фондот за поддршка на талентирани средношколци и студенти „Таленти денес – лидери утре“ овозможува развој на младите преку менторство, обуки, пракса и учество на меѓународни натпревари

Скопје, 22.05.2019Фондот за поддршка на талентирани средношколци и студенти „Таленти денес – лидери утре“ на  меѓународната невладина организација Македонија 2025 им додели 10 стипендии на талентирани млади за тековната 2019 година. Стипендирањето на десетте средношколци и студенти им овозможува континуиран развој на талентот и вештините преку менторство, учество на меѓународни натпревари, обуки, како и пракса во истакнати компании. Стипендиите се обезбедени преку донации и соработка со корпоративните и индивидуални партнери на организацијата Македонија 2025.

„Ни претставува задоволство што Фондот за поддршка на талентирани средношколци и студенти обезбеди средства да им помогне на талентирани млади од земјата во периодот  2019-2022. На овој  начин, нашата организација активно придонесува кон развојот на инклузивно општество и ги поддржува младите во државата да ги остварат своите целосни професионални и лични потенцијали. Овие млади лица се нашата иднина и наши вистински амбасадори низ светот. – изјави проф. д-р. Никица Мојсоска Блажевски, Главен извршен директор на Македонија2025.

Еден од минатогодишните стипендисти на Фондот, Давид Лазароски, кој е студент на Факултетот за информатички науки и компјутерско инженерство (ФИНКИ) во Скопје, вели дека токму ваквиот тип на помош е она што им е потребно на младите во земјата. Преку Фондот, тој учествуваше на регионалниот научно-спортски натпревар „Приматијада 2019“ во Бугарија, каде го освои првото место и успешно ги надгради своите вештини од областа на природните науки.

„Оваа благотворна активност на Фондот на Македонија 2025 е навистина значајна затоа што на младите им овозможува развој на талентот преку работа во реалниот сектор и стекнување важни искуства, а паралелно со тоа им отвора можности да се споредат и натпреваруваат со своите врсници надвор од државата. Така се градат вистинските идни лидери“, истакна , Ангелка Пеева Лауренчиќ копретседавач на донаторскиот настан на кој беа собрани дел од средствата за стипендирање.

Ова е само една од иницијативите преку кои Македонија2025 ја остварува својата мисија – поддршка на економскиот развој и подобрување на животниот стандард на граѓаните. На настанот им беа врачени и признанија на компаниите и индивидуалните донатори на Фондот за поддршка на талентирани средношколци и студенти „Таленти денес – лидери утре“.

Отворен повик: Програма за претприемачи на семејството Битов

By | Announcements | No Comments

Микро, мали и средни претпријатија можат да аплицираат за стипендија од 5000 американски долари и да остварат можност за менторство од врвни канадски советници

Битов-програмата за претприемачи (The Bitove Family Entrepreneurship Program) е воведена во 2018-та година преку Македонија2025 и Фондацијата на семејството Битов, а во соработка со CESO (Canadian Executive Service Organization)СЕЅО е канадска организација со 50 годишнo искуство во меѓународниот економски развој. Организацијата работи на развој на приватниот сектор и на зацврстување на структурите кои ги водат економските и општествените промени на локално, национално и меѓународно ниво. Сите заинтересирани микро, мали и средни претрпијатија можат да аплицираат за стипендија во вредност од 5000 американски долари.

Советниците на СЕЅО се професионалци со богати професионални кариери. Тие ќе работат на конкретни предизвици со кои македонските компании се соочуваат секојдневно. Канадските советници, според својата експертиза ќе бидат поврзани со компанија и ќе дојдат во Македонија со цел да работат заедно со македонските претприемачи на развој на нивната компанија. Тие ќе бидат на располагање на компанијата во времетраење од 2-4 недели, во зависност од проценката на самиот советник за потребата од неговото присуство во компанијата, како и барањето на самата компанија. За време на тој период, советникот преку обуки и менторство, ќе ги пренесува најдобрите бизнис алатки, процеси и системи за подобрување на организациските, производствените, аналитичките и маркетиншките процеси на компаниите.

Советниците опфаќаат најразлични области, вклучувајќи: финансии, туризам и угостителство, агри-бизнис, ИКТ, менаџмент на природни ресурсиобновливи извори на енергија, преработка на храна итн.

Кој може да аплицира?  

Програмата е наменета за микро, мали и средни претпријатија кои ги исполнуваат следните услови:

  • Минимум постоење од една година;
  • Сопственик и управител на компанијата е македонски државјанин и жител;
  • Високо ниво на посветеност од страна на менаџментот на компанијата;
  • Експертиза во одредена област;
  • Во добра финансиска состојба (има можност за имплементирање на промените и препораките од советникот);
  • Ги исполнуваат критериумите за мали и средни претпријатија во Македонија.

Предност ќе имаат компании кои се извозно ориентирани и имаат иновативни решенија.

Што обезбедува Македонија2025?

  • Трошоци за пат, виза, осигурување и тарифа на советникот;
  • Евалуација на апликациите, водење на целиот процес на селекција, закажување интервјуа со интернационална комисија и претставници од СЕЅО;
  • Координација на сите активности пред доаѓањето на советникот во компанијата;
  • Следење на соработката помеѓу советникот и компнијата.

Што обезбедува кандидатот?

  • Лице од компанијата кое ќе биде постојано достапно на советникот, најтесно ќе соработува со него за време на посетата и има добро познавање на англиски јазик;
  • Сместување и трошоци за храна во текот на целиот престој на советникот;
  • Локални патни трошоци за советникот (доколку е потребно).

Дополнително компаниите може да се погрижат и за викендите и слободното време на советникот.

Како да аплицирате?

Сите заинтересирани, треба да испратат следните документи на gordana@macedonia2025.com:

  • Пополнета апликација на англиски јазик, која може да ја симнете тука
  • Краток опис на вашата компанија, како и за тоа зошто ви е потребен советник (на англиски јазик);
  • Дополнителни документи, брошури или каталози за компанијата се добредојдени.

 

Досега, низ програмата имаат поминато осум компании, кои веќе ги чувствуваат огромните придобивки. На линковите подолу можете да најдете повеќе информации за позитивните искуства од програмата, додека во наредниот период, ќе бидат објавени и останатите материјали. Следете нѐ!

ЛИДЕР проектот веќе 12 години успешно го поттикнува претприемништвото кај младите луѓе во земјата

By | Announcements | No Comments

Вчеравечер, во рамки на програмата за бизнис и претприемништво – ЛИДЕР проект, организирана од Македонија 2025, се одржа настан за вмрежување, каде годинешните учесници, алумни, партнери и други поддржувачи на проектот, во неформална атмосфера имаа можност да дискутираат за позитивното влијание на програмата врз квалитетот на бизнисите и нејзиниот значаен удел во поттикнување на конкурентноста, претприемништвото, иновациите и лидерството базирано на вредности. На настанот се обратија проф. др. Никица Мојсоска Блажевски, главен извршен директор на Македонија2025, понатаму директорот на Фондот за иновации и технолошки развој – Јован Деспотовски, Амбасадорката на Канада во Србија, Северна Македонија и Црна Гора – Н.Е. Кати Чаба, како и Виктор Мизо – директор на „Костал“ и претседавач на ЛИДЕР проектот оваа година.

Се надевам дека ова двонеделно искуство ќе ви помогне вам, годинешните учесници, да ги развиете и усовршите вештините од областа на финансии, маркетинг, лидерство, продажба, промоција, кои пак ќе ви помогнат во вашиот професионалниот напредок и реализација на целосниот потенцијал. Преку стекнување на овие вештини, вие ја имате можноста да станете лидери во вашата област, без разлика дали ќе основате свој бизнис или ќе работите во корпорација. Бизнис школата Ричард Ајви е една од најдобрите школи во Канада и чест ни е штo Македонија2025 по дванаестти пат успешно го организира ЛИДЕР проектот.“ – изјави Н.Е. Кати Чаба, Амбасадорка на Канада во Србија, Северна Македонија и Црна Гора.

Како директор на Фондот за иновации и технолошки развој, Јован Деспотовски, ги посочи големиот број на можности за финансирање и поддршка на постоечките и идни бизниси.

„Во Фондот за иновации и технолошки развој, нудиме голем број на иницијативи наменети за младите. Веќе имаме засебна програма која е фокусирана исклучиво на стартап компаниите. Во склоп на истата, минатата година пристигнаа 200 апликации, од кои најдобрите 60 добија финансии, техничка поддршка и менторство. Би сакал да порачам најдобро да го искористите она што го нуди ЛИДЕР проектот, а потоа да аплицирате на некој од нашите повици. Наша цел е да помогнеме на што поголем број стартапи и да бидеме ваш партнер во бизнисите кои сакате да ги развиете.“ – истакна Деспотовски.

Македонија2025 досега има овозможено учество на повеќе од 400 идни и сегашни претприемачи да бидат дел од оваа програма, а со тоа и во чекор со најновите светски трендови во деловниот свет. Годинешниот ЛИДЕР проект завршува на 17-ти мај (петок) , со презентација на бизнис идеите на учесниците пред стручно жири, составено од истакнати претставници на бизнис секторот во земјата.

Започна дванаесетото издание на ЛИДЕР Проект: Врвна програма за бизнис и претприемништво

By | Announcements | No Comments

Денеска започна дванаесетото издание на ЛИДЕР проект, во организација на Македонија 2025, кој ќе трае десет работни денови. Врвни инструктори од познатата бизнис-школа Ричард Ајви при Универзитетот од Канада, ќе го пренесат своето богато меѓународно искуство и лидерски вештини на околу 40 тековни и просперитетни претприемачи од земјава.

Обуката е градена според МБА програмата на школата Ричард Ајви и вклучува пренесување на широк распон на знаења како подготовка и оценување на изводливост на бизнис план, развивање стратегии, брендирање на производ, маркетинг, финансирање, управување со човечки ресурси итн. Истатa се изведува практично, преку интерактивна анализа на уникатни студии на случај и развој на сопствени бизнис планови, со можност за дополнително индивидуално менторство.

„Интересот од година во година е сè поголем од страна на претприемачите кои сакаат да се стекнат со нови знаења, кои подоцна ќе ги имплементираат во своите постоечки или новоосновани бизниси. Со над 400 алумни и со проширување на соработката со други организации од регионот, ЛИДЕР проектот постана една од највлијателните обуки за бизнис вештини во земјата.“ – објаснува проф. д-р. Никица Мојсоска Блажевски, Главен извршен директор на Македонија 2025, која денеска официјално ја отвори програмата.

Главната цел на ЛИДЕР проектот е да им помогне на талентираните македонски претприемачи да ги претворат своите идеи во успешни бизниси, а со тоа да придонесе и за зголемен развој на економијата воопшто.

ЛИДЕР проектот е овозможен благодарение на соработката помеѓу Македонија2025, канадската бизнис-школа Ричард Ајви и Амбасадата на Канада во Србија, Северна Македонија и Црна Гора.

Една целосна и две половични стипендии за Проектен менаџмент на Руската претседателска академија РАНЕПА

By | Announcements | No Comments

Руската претседателска академија РАНЕПА доделува три стипендии за македонски студенти за мастер програмата Project Management која се одвива на англиски јазик. Ќе бидат доделени една целосна и две половични стипендии.

Целокупната двегодишна програма изнесува 15 000 долари, при што оние кои добиваат 50% стипендија, школарината би ги чинела 7 500 долари, кои можат да се плаќаат и семестрално.

Потребни документи за аплицирање во првичната фаза се:

  • Кратка биографија;
  • Мотивациско писмо;
  • TOEFL (или друг релевантен сертификат за познавање на англиски јазик);
  • Препораки.

Кандидатите кои ќе го поминат првичниот процес на селекција, ќе добијат информации за останатите потребни документи при понатамошниот процес на аплицирање.

Понудените стипендии ја покриваат само школарината. Ве молиме имајте предвид дека Руската претседателска академија РАНЕПА нуди можност за сместување во кампусот, при што за добитникот на целосната стипендија трошокот ќе изнесува околу 30 долари месечно, а за добитниците на половични стипендии трошокот ќе изнесува околу 200 долари месечно.

Потребните документи испратете ги на office@macedonia2025.com, најдоцна до 27.04.2019 со назнака „Апликација за стипендија – РАНЕПА“.

Повеќе информации за програмата на официјалната веб-страна ОВДЕ.