Како да изградите пријателски однос со корисниците и да ја добиете нивната лојалност

posted April 19, 2017

Кога станува збор за долгорочното одржување на пазарот за одреден производ или пак цела компанија, неизбежен дел од формулата за успех припаѓа на потребата од негување на одлични односи со клиентите и корисниците.

Во денешниот хиперконкурентен и хиперактивен свет, апсолутно е нужно не само да се привлече вниманието на корисниците, туку да се задржи на што подолг рок и воедно да се надминат очекувањата на корисниците. Успехот на една компанија може да зависи од нејзината способност да биде „дружељубива“ со потрошувачкото општество.

Во тој поглед ќе понудиме неколку насоки како компаниите можат да го градат односот и да ја воспостават интеракцијата со надворешниот свет преку користење на социјалните медиуми.

Интернетот е „другиот“ свет во кој луѓето живеат и се однесуваат едни кон други. Денес и во Македонија ретки се компаниите кои не се на интернет, на еден или друг начин. Ова важи до толку што дури компании за молерски услуги и градежни тајфи имаат свои групи или профили каде потенцијалните клиенти можат да ги дознаат барем нивните контакт информации. Може да се каже дека оној кој не е присутен на интернет, речиси и да не постои.

Но дали е доволно компанијата да има само своја веб страна и профил на фејсбук или инстаграм? Оние компании кои го гледаат вистинскиот потенцијал на интернет, треба да изнајдат дополнителен начин како да изградат пријателство со корисниците и клиентите.

Дали тоа ќе се направи преку некоја паметна апликација која ќе им побуди интерес на корисниците да дадат приватен фидбек или пак јавно да ја „пофалат“ компанијата/производот; преку ексклузивни содржини кои ќе ги добиваат вашите корисници или пак ќе биде нешто сосема поинакво, зависи од вас, но неминовно, корисниците мора да имаат чувство на припадност.

Денес покрај сите постоечки маркетиншки алатки и поради презаситеноста од различните канали за комуникација, се повеќе ни е потребна комбинација од интернет присуството заедно со класичниот директен пристап. Можеби се прашувате зошто?

Сетете се кога последен пат сте се израдувале на мејл во вашиот инбокс? Како би се почувствувале доколку ја добиете истата порака преку вашето поштенско сандаче или преку смс? Нормално секој би се почувствувал убаво доколку добие порака која е персонализирана и се издвојува од оние 100+ мејлови кои ве чекаат секој понеделник кога ќе стигнете на работа.

Според тоа, интеракцијата со потрошувачкото општество треба да биде изведена на интелигентен начин, што е временски истраен и што привлекува кон доброволно учество во тоа што го прави вашата компанија.

На пример, еден ресторан може да им понуди на клиентите да го опишат во конкретни термини јадењето и угостителското искуство, а за возврат најконкретните мислења да добијат некаква награда. Архитектонските студија можат да понудат виртуелна прошетка низ нивното најдобро дело. Модните студија можат да направат мобилна апликација преку која корисниците ќе комбинираат разни парчиња облека на свој персонализиран аватар. Фото студијата можат да ги „прашаат“ потенцијалните клиенти какви агли и пози преферираат од посетителите на нивниот настан. Идеите се бесконечни, но фокусот секогаш треба да биде корисникот да има непосредно искуство што го доближува до вас. Размислете што би можело дополнително да ги возбуди вашите клиенти? Дали доколку веста за новата апликација/кампања ја добијат преку е-билтен можеби ќе ја доживеат исто како и повик од лице за продажба или писмо со куса персонализирана порака?

Запаметете, луѓето скоро секогаш ќе го заборават она кое сте им го кажале, но скоро невозможно е да заборават како сте направиле да се почувствуваат.

Понатаму, на луѓето им годи кога се чувствуваат инспирирани, а еден од најдобрите стимули е кога другите ќе ве пофалат за вашиот добар учинок. Спојот на инспирација и чувство на значење е одлична насока кон градењето на поблизок однос со потрошувачката заедница. Најдете начин да ги инспирирате луѓето да го најдат своето место, на пример, да бидат креативни или да бидат во добро расположение – и покажете им како. Од една страна, тоа испраќа позитивни пораки кон корисниците и клиентите, а од друга страна, на тој начин ја претставувате идејата дека вашиот производ или услуга може да биде средство преку кое луѓето ја реализираат својата креативност. Следниот пат дајте им посебно внимание на вашите 10 најредовни купувачи или корисници на вашите услуги преку убав подарок и инспиративна персонализирана порака. Воедно дајте им задача, побарајте сугестија од нив, натерајте ги да размислуваат креативно.

Не сте сигурни што мислат вашите клиенти за вас или како најдобро да ги изненадите/инспирирате? Употребете некоја од алатките за фидбек и анкетите за задоволство на корисниците, така најлесно можете да ги откриете желбите и ставовите на вашите целни групи.

И за крај, размислете што можете да направите за вашите клиенти и корисници да се пронајдат како дел од една поголема група луѓе. Луѓето секогаш се поистоветуваат со оние што имаат слични интереси како нив и притоа, сакаат да припаѓаат на специфична група. Секогаш има начин како да им ставите до знаење на луѓето дека преку користење на вашиот производ или услуга тие се дел од нешто поголемо. Најдобро е кога на корисниците ќе им понудите начин како да имаат меѓусебна интеракција преку вашата компанија или нејзиниот најпрепознатлив производ.

back